Помина доста време од последната Џек-центрична епизода. Ако добро се сеќавам, последниот пат кога имавме можност да го видиме стариот добар Џек во главниот фокус на вниманието беше пред безмалку цела година – во (барем за мене) една од најдобрите епизоди в минатата сезона, 316.
Она што е фасцинантно е колку оној Џек од минатата сезона се разликува со сегашниот Џек од новата сезона. Уште пофасцинантно е како истиот тој карактер кој ако нешто мразеше во својот живот, беше односот кој го имаше со својот татко, ја сфати црната вистина – дека ненамерно започнува да се претвора во бледата искривена слика ТОКМУ на истиот тој негов татко. Лесно е да се направи некој лик херој, но тешко е истиот тој да изгледа толку реално на малите екрани. Ретки се сценаристите кои можат да сторат вакво нешто. Мислам, доволно е да направите споредба на Џек Бауер (од 24) со „нашиот“ Џек за да ми ја сфатите поентата… 
Генерално земено, ова беше уште една одлична сетап епизода. Немаше акција, но на епизодите од ваков тип, не им е ни потребна акција. Lighthouse го имаше најважното нешто во себе – ДУША, а без константното присуство на Харли и Џек во овие засега последни 40 минути од шоуто тешко дека ќе се постигнеше вакво нешто…
Мајлс ја знае вистината!
Сега е веќе повеќе од јасно дека Клер умре во онаа експлозија на куќите во селото на DHARMA во “The Shape of Things to Come”. Со оглед на тоа што Саид беше „завземен“ од темната страна веднаш по својата смрт, можеме да претпоставиме со 99,48 проценти сигурност дека главниот предуслов за нечие тело/душа да биде искорумпирана од Флок, непријателот на Џејкоб, е токму тоа – смрт, па одеднаш „оживување“.
Веројатно тоа сакаше и да ни го каже Мајлс во премиерата со оној хорор поглед кој го упати кон тогаш се’ уште мртвото тело на Саид. Впрочем, неговиот поглед има уште поголема смисла ако се знае дека уште две сезони претходно тој слично нешто имаше можност да види и во случајот со Клер. И тогаш, ако ве држи добро меморијата, ќе се сетите колку Мајлс се однесуваше чудно во нејзино присуство. Слична е ситуацијата и сега. Ова е веројатно доволен показател дека што и да е вгнездено во душите на Саид и Клер, далеку е од добро нешто!
Еве неколку интересни слики превземени од “Something Nice Back Home“, епизодата во која Клер исчезна… Обрнете внимание на Мајлс!
А, и уште еден интересен цитат исто така од четвртата сезона, овојпат од “The Shape of Things to Come”:
Клер: (по експлозијата, одговарајќи на прашањето дали е добро) Yeah, a bit wobbly, but, uh, I’ll live.
Мајлс: Well, I wouldn’t be too sure about that.
Во тоа време ова беше обичен цитат, но гледано од сегашна перспектива, можеби било и хинт, кој знае?!?
Кристијан Шепард – сепак жив?!
Помина доста долго време откако го видовме за последен пат таткото на Џек во Lost, иако во шестава сезона е постојано спомнуван, на ваков или онаков начин, во оваа или онаа реалност. Она што мене навистина ме збуни во епизодава беше тврдењето на Клер дека најпрвин нејзиниот татко ја убедил оти Арон бил киднапиран од страна на Другите, а ДУРИ ПОТОА и нејзиниот пријател.
Да, знам, Клер е новата Русо, а сите знаеме колку Русо беше „мрдната“ од… хмм, од сешто, но ако ништо барем сигурни сме дека таа не лажеше за нејзиниот пријател… Што значи дека многу е веројатно дека не лаже ниту за појавувањето на својот татко на Островот. Иако сум повеќе од сигурен дека оваа мистерија ќе ни биде многу лесно разрешена во некоја од наредниве епизоди, сепак ќе се обидам да дадам одговор уште сега на ова прашање кое верувале или не се развлекува во целосниот тек на серијата!!!
Ние го видовме постариот Шепард за првпат во “White Rabbit”, петтата епизода од првата сезона, кога Џек со часови го бркаше духот (духот?) на својот мртов татко на Островот. Оваа нивна несекојдневна средба како што знаете беше адресирана и во новата епизода. Тука секако дека постои некоја поврзаност, не верувам сценаристите колку за онака да ни ја дадоа онаа сцена со Адам и Ева (за неа малку подоцна ќе се навратиме повторно!). Што значи ова? Па, ништо. Се’ уште може да се каже дека постојат две опции: или во еден период телото на Кристијан да било завземено од непријателот на Џејкоб (како што е сега случајот со телото на Лок), или пак тој да бил оживеан на сличен начин како што оживеаја и Саид и Клер.
Бидејќи лани во исто време ги видовме „Лок“ на Хидра Островот и Кристијан Шепард во DHARMA селото, јас ќе се обложам на втората теорија!… Секако, се’ уште не ја исклучувам ниту првата, од едноставна причина што до овој миг не сме сигурни како точно Флок функционира, и дали може да биде навлезен во повеќе од едно тело… Очекувам многу ваши мислења на оваа тема исто така!
Адам и Ева… повторно и повторно и… ПОВТОРНО!
Ако нешто оваа сезона сфативме, тоа е дека секој цитат ќе биде важен. Таков беше случајот со премиерата, а таков ќе биде и со остатокот од сезоната. Ако не се согласувате со мене, тогаш очекувам да ми дадете барем три примери од минатите 5 сезони каде што доживеавме да слушнеме нешто од типот на „извини што мораше да ме видиш таков“ (Лок, откако се претвори во Чудовиште).
Токму затоа, сметам дека коментарот на Харли за двата скелета од пештерите и те како треба да се сфати како сериозен. Во ред, не треба да се претерува и да се кажува оти скелетите потекнуваат уште од времето на диносаурусите, но делот со патување низ времето и завршувањето на својот живот во минатото не верувам дека е само една шала приредена од страна на Дарлтон!
А, и кога сме веќе на оваа тема, досега Роуз и Бернард ги видовме само во алтернативната реалност. Нешто смрди тука зарем не? Погодувате ли? Да, се’ уште мислам дека тие двајца се Адам и Ева, и дека го завршиле својот живот токму на начинот кој ни го опиша Харли!!!
Двете реалности се поврзани. И точка.
Се надевам дека досега го сфативте ова. Ако не, тогаш ви нема поправка.
Прашањето на Џек во врска со слепото црево е уште еден од низата хинтови на оваа тема. Сепак, нештото кое и дава голема тежина на алтернативната реалност е фактот што истите луѓе кои ги гледаме на Островот во сегашноста, се дел од „вистинскиот“ живот во паралелниот универзум! И да, најмногу изненадува што ова не е случајот само со преживеаните од летот 815, туку и со некои важни „фаци“ во хиерархијата на Другите, како Бен (кој се чини дека е професор), како и Доген (кој слично како и Џек има свој син…)
Очигледно е дека сцената со потопениот Остров од премиерата ќе биде од големо значење, но какво точно, веројатно ќе дознаеме дури при самиот крај на серијата…
Светилникот
Дојде време и за самиот светилник, кој што беше и главниот дел од оваа епизода. Како што сите од Вас веќе сигурно знаат, Џејкоб истиот го користел за да ги набљудува своите кандидати. Да, многу чудно дури и за LOST стандардите, но истовремено и кул…
Имав одредени недоумици кога првпат ја гледав епизодата за кандидатот со број 108 (Волас), но по второто гледање сфатив дека оваа цифра Џејкоб му ја кажа на Харли од прва рака, да не речам рандом… Кристално јасно е дека главната цел на Џејкоб беше Џек да ја осознае вистината за своето доаѓање на Островот.
Кога веќе ги спомнав Џек и Харли, очекувам двајцава да испаднат исклучително важни фигури во штотуку започнатата војна на Островот. Сепак, се зависи од тоа дали Џек ќе го положи „тестот“ на Џејкоб или не. Харли е оној пак кој ќе биде тука за да ги пренесува инструкциите на Џејкоб… Можеби токму ова и ќе биде клучот за разврската во серијата – на крајот Џек ќе ја завземе позицијата на Џејкоб и некако ќе успее да го оствари својот дамнешен план – за „ресетирање“ на сите настани случени на Островот?!
Како и да е, малце забегав вон контекст. Она што сакав да го допишам во врска со светилникот е дека истиот уште повеќе ни го доближи одговорот за бројките. Дали е возможно иститеда биле САМО едни обични степени за сите 360 кандидати???
Џејкоб vs. Флок
Во последно време се повеќе забележувам одредена „претпазливост“ помеѓу фановите на Изгубени кога се дискутира на оваа тема. Во теориите од минатата недела спомнав дека главната тема во серијата е борбата помеѓу доброто и злото, што е секако вистина, иако не треба да се занемари фактот дека Lost е комбинација на повеќе мотиви од кои најважен е токму овој кој го спомнав пред малку.
Јас сфаќам дека недостигот на одговори во секое појавување на Џејкоб на Островот е навистина иритантно, но ни малку не можам да сфатам зошто овој „тренд“ фановите го сфаќаат како лоша работа. Ако малку подразмислите, ќе сфатите дека всушност главниот подвиг т.е. карактеристика на најголемите верници во Бога (бидејќи, нели, оваа тема е чисто Библиска, сметам дека треба да имаме директна компарација со Светото Писмо, не е дека се правам сега тука експерт!) е нивното „слепо“ верување во Бог. Од друга страна, оние кои се неверни, или т.н. грешници постојано се запрашуваат во смислата на Возвишениот и бараат експресни одговори на невозможни прашања, како на пример зошто живеат, зошто би верувале во нешто кое што не го виделе итн…
Значи, од оваа гледна точка, јасно е кој е добриот, а кој е лошиот. Не може Флок кој им ветува одговори на сите од околу да биде добар, само бидејќи е отворен максимално. Неговите амбиции се далеку од добри, а за тоа доволна потврда е неговото нетрпение кон Џејкоб и неговите луѓе, чиј исход ќе го видиме каде и да е. (со оглед на тоа што сега тој со Клер ќе тргне кон Храмот)
Пред да ги затворам официјално и овонеделните теории, само да додадам дека се повеќе почнувам да верувам во теоријата дека и Флок во одреден период бил кандидат на Џејкоб. Слично како и за легендата за паднатиот ангел, Луцифер, така и тој еден ден посакал да стане владетел на светот (Островот). Во прилог на ова оди и коментарот на починатиот лидер на Другите од LA X, кој гласеше вака: “I was killed by an old friend who grew tired of my company.” Симптоматично, зарем не? 
Со нови теории повторно идната недела! Го очекувам Вашиот коментар на денешните.
Поздрав до сите!
Линкови за стримот од ABC имате подолу!
